Artxiboa Abendua 2010
Olentzerori gutuna II
Julenek hirugarren munduko haur baten gutuna idatzi zuen. Nekane Gonzalezek, berriz, behin Gabon Gaua pasatuta, eskatutako oparia jaso ez duen lehen munduko haur batek Olentzerori bidaltzen dion bigarren gutuna.
Apa Olentzero ni naiz berriro
jarriko naiz dramatiko.
Eskatutakoa ez da iritsi
eta ez da iritsiko.
Behar handia nuela esan,
esan nizun oso tinko.
Nahiz eta amak dion gabe ere
ez naizela bela hilko.
Zergatik ez dakit ondo baina
jada ez zaitut begiko.
Nola hasierako ilusioa
ez den izaten betiko.
Punta-puntako iPod bikain bat
ez didazu ekarri, kitto!
Beraz, erregeei eskatuko diet
nahiz ez izan monarkiko.
Doinua: “Martxa baten lehen notak”
Egilea: Nekane Gonzalez
Olentzerori gutuna
Julen Agirreburualdek Olentzerori egindako gutuna jarri du bertsoan. Afrikako ume baten azalean idatzi du gutun hunkigarri hau.
“Eskerrik asko” batekin hasiz
Olentzerori gutuna;
Txertoak ere afrikaraino
ekartzearren, laguna.
Badakit ezin duzula senda
nik dudan gaixotasuna
Beste urte bat bizirautea
da eskatu nahi duguna
Eta herriak bidaliko du
etengabe maitasuna
Doinua: Aita Izena
Egilea: Julen Agirreburualde
Gatazkari
Bereterretxeren kanthoria gogoan, gaur egunera egin du jauzi Asier Iriondok bere bertsoan.
Gaztanberen eta haltzen
garaia igaro al zen?
Galderak gero ta urriago
ta erantzunak ugaltzen,
guk ez dugu nahi jarraitu beste
bostehun urte gerrak galtzen
Doinua: Urzo zuria errazu
Egilea: Asier Iriondo
Euskal Selekzioa
Hiru urte eta gero Euskal Selekzioak Gabonetako partida jokatuko du. Baina noiz iritsiko da ofizialtasuna? Horra Joserra Salegiren bertsoa.
Behar dan bezela antolatzea
Da betiko zailtasuna
Euskal selekzioaren kontra
Badaukate batasuna
Harrotu ditu hainbeste jende
Bere “la roja” kuttuna
Kaltetako ukatzen digute
Denok eskatzen duguna
Euskaldun guztion nahia berez
Da ofizialtasuna.
Doinua: Itsasoari begira
Egilea: Joserra Saralegi
