Apa Olentzero ni naiz berriro

jarriko naiz dramatiko.

Eskatutakoa ez da iritsi

eta ez da iritsiko.

Behar handia nuela esan,

esan nizun oso tinko.

Nahiz eta amak dion gabe ere

ez naizela bela hilko.

Zergatik ez dakit ondo baina

jada ez zaitut begiko.

Nola hasierako ilusioa

ez den izaten betiko.

Punta-puntako iPod bikain bat

ez didazu ekarri, kitto!

Beraz, erregeei eskatuko diet

nahiz ez izan monarkiko.

Doinua: “Martxa baten lehen notak”

Egilea: Nekane Gonzalez

“Eskerrik asko” batekin hasiz

Olentzerori gutuna;

Txertoak ere afrikaraino

ekartzearren, laguna.

Badakit ezin duzula senda

nik dudan gaixotasuna

Beste urte bat bizirautea

da eskatu nahi duguna

Eta herriak bidaliko du

etengabe maitasuna

Doinua: Aita Izena

Egilea: Julen Agirreburualde

Gaztanberen eta haltzen

garaia igaro al zen?

Galderak gero ta urriago

ta erantzunak ugaltzen,

guk ez dugu nahi jarraitu beste

bostehun urte gerrak galtzen

Behar dan bezela antolatzea

Da betiko zailtasuna

Euskal selekzioaren kontra

Badaukate batasuna

Harrotu ditu hainbeste jende

Bere “la roja” kuttuna

Kaltetako ukatzen digute

Denok eskatzen duguna

Euskaldun guztion nahia berez

Da ofizialtasuna.

Doinua: Itsasoari begira

Egilea: Joserra Saralegi

Andereño Axun

Ama onenaren paren

hegalpean hezi gaitu,

hapi epelen babesa eman,

kantuz ferekatu.

Apaltasunan eredu,

izan hala da amaitu.

Bere irriparra gogoratzean

nola ez hunkitu?

Egilea: Luis Arrieta

Inozentzio Olea

Euskal ukituko ore,

usain ederreko lore.

Ekin ta ekin gure hizkuntzan

ezin egin hobe.

Joan zara ta zu gabe

umezurtz eta huts gaude.

Bertso eskolako guztion partez

agur ta ohore.

Egilea: Nekane Gonzalez

Doinua: Mendian gora

Gonzalez jauna zure hitzekin

zirrara sortu da gugan

erabaki bat hartu zenuen

behin egindako bilkuran

El Paiseko elkarrizketan

ez zara ibili dudan

boteretsuek mingaina libre

izaten baitute gudan

ez dut esango terroristatzat

ikusi ote zaitudan

ez naiz hasiko kriminal hutsa

zaitugula esan guran

edo torturen bultzatzaile bat

ernai dagoela zugan

badaezpada, ez dut esango

benetan zer uste dudan

Doinua: Haizea Dator

Egilea: Asier Iriondo

Zapatila bi, galtzerdi txuriz
ta kamiseta lodia,
praka motzetan dabil urlia
txandalakin berendia.
Bazkaritara sandiak digu
Donostin batu sendia,
azaroako igandeetan
bigarrena da handia:
udazkenero loratzen baita
gripeaz gain Behobia.

Doinua: Mutil koxkor bat
Egilea: Joseba Barandiaran

Bi mila hiru, martxoak hogei

gau gabeko egunean

Irakiarrak indar menpeko

yankien boten azpian

orduko suak oihuak eta

bortizkeriak finean

eginak ziren leial ta zintzo

guduaren izenean.

Hasitakoa jarraitu behar

finkatuz indarrak bertan

lurralde dena okupaturik

armak jasorik soinean

harro ta itsu jar daitekeela

gizakia holakotan

dena da OK, baliozkoa

guduaren izenean

Baina ez pentsa mundu guztia

geundenik ez jakinean

nahiz “Wikileak” egun hauetan

zabaldu argi aidean

hogei ta hamar hildako omen

egunero azkenean

torturatuak zenbatu ezin

guduaren izenean.

Egindakoak eginda ere

mundua bere horretan

horrelakoak gerta ta gerta

berdin hemen edo ta han

justizia ta legea inoiz

ez doaz ez eskutikan

geuk ahalegin bat egin dezagun

eskubideen izenean.

Doinua: Arratsalde on Lehendabizitik

Egilea: Joxe Arizkorreta

Haizea dabil dantzan
buelta ta jiraka
hostoak arin-arin
sakabanatuta
usai berezi dago
euriak launduta
udazkena berriro
ongi etorrita
lalai lalai lalai
ongi etorrita

Doinua: Dama Gazte Xarmant bat

Egilea: Isa Díaz Bravo

Umeak ostegunetan
seiak eta erdietan
helduak ostiraletan
elkartzen dira seietan
gonbidatuak zaudete denok
azaldu zaitezte bertan
zin egiten dut egongo dela
giro polita benetan
Asier, Julen eta Nerea
irakaslego lanetan
egongo gera esku zabalik
lokaleko ateetan
ez dakiena badator ere
jarriko de(g)u bertsoetan

Egilea: Julen Agirreburualde

Doinua: Munduko ilunabarra