Haurren oporrak, eguzki epela

oraintxe gaude konpleto.

Beti esan da uda partean

gizakia dago hobeto.

Fuera jertseak ta tapakiak,

jantzi bikini edo peto.

Solstizioa dugu ta piztu sua

gainetik jauzi egiteko.

San Joan su hortan ideiak behintzat

ez ahal zaizkigu erreko (bis).

Doinua: Mutil koxkor bat

Egilea: Nekane Gonzalez

Hegialdeko festak joan dira
ez dira izan hain txarrak
EGANekin bat, hegan ein genun
ikusi arte izarrak
larunbatean izan genitun
aspirinaren beharrak
ta igandean ziztu bizian
zaldien anai zaharrak
lau hankakoak ez ziren bertan
zebiltzan asto bakarrak

Doinua: Misiolari baten moduan

Egilea: Julen Agirreburualde

Hauteskundeak direla eta

zer nolako ezustea

gobernu bati sartu dioten

golak izan du ospea

eraso (rubalcaba) latza izanagatik

eta defentsa (chacón) gaztea

sasoiz makalik heldu direnez

bai bata ta bai bestea

azkenerako erabaki du

arbitroa erostea

Doinua: Mutil koxkor bat

Egilea: Asier Iriondo

Izaskun Bilbao hauteskundetan

aurkezten zaigula eta,

Bruselarako bere programan

egin denok ikerketa:

Gazteleraz “cambio climatico”n

jarria dauka arreta,

baina euskaraz ezberdina du

kezka iturrien meta,

igoal hargatik aipatzen digu

”eguraldi aldaketa”.

Doinua: Semaforoak gorri ta berde

Egilea: Joseba Barandiaran