Hemen zaude: Hasiera / Blogak / LBO

LBO Legazpiko Bertso Olariak, Legazpiko bertso eskola osatzen dugun taldekideak gara. Astero astero bildu eta bertsotan aritzeaz gain beste hainbat ekitaldi bultzatzen ditugu, besteak beste bertso-saioak ,bertso afariak... Ostiralero biltzen gara Bertso-Olarien lokalean, hau da, Itxaropengo azkenaurreko lokalean, bertsotan aritu eta ekitaldiei eta beste hainbat gauzi buruz hitzegiteko. Partaidetza noski librea da, eta edonor ager daiteke bertara. Blog honen asmoa talde hau mundura zabaltzea da, eta nahiz eta badakigun kazakhstan-en ez digutela kasu zipitzik ere egingo gutxienez gure apurra hemen da. Denborarekin bertsoak eta antzerako materiala gehitzen joango gara! Eskerrikasko ta ondo segi!!

Aste Santuetako errezoa

2014/04/20 17:48
Isak garbi dauka bere erlijioa zein den, habanera ederrean argitu digu hori:

Aste Santuko oporrak
urteko une gozoa
Batzuk kanpora badoaz
egitera turismoa
Bertan geratu garenak
ez gaude ezerosoa
Eguzki distiratsua
zerua urdin osoa
Mendi aldera joatean
usai deliziosoa
Zelai berde batean
hantxe gaude erosoa
Euskal Herriko paisaia
hau bai da itxurosoa
Zuhaitz lore eta lurrari
da Isaren errezoa

Doinua: Habanera

Egilea: Isa Díaz Bravo

Udaberriko bertsoak

2014/04/01 12:55
Asteburu honetan habaneraren doinuan kantatu du udaberriak.

Delgadotarrek urtetan

eutsi diozue tinko,

Goñitarrak ere hortxe

beti adore handiko,

Solana eta Arrondo

euren ideietan finko,

Alazne eta Itsaso

egin ditugu sendiko.

Hargatik armadaren bat

urrutiko, atzerriko…

ez da berriz bahiketaren

tentazioan jausiko,

baina tentatuta ere,

badakigu geurekiko,

herri honek ez diela

bi lagun kentzen utziko.

Doinua: habanera

Nafarroez

2014/03/18 18:53
Legazpiko eta Euskal Herriko Nafarroak konparatu ditu Josebaren bertsoak.
Nafarroako berriak datoz
ta dute ustel usaina
Barcinarena hankaz gora da
kezkatzeraino Espainia
Legazpin berriz Nafarroa da
kale zaharra alajaina
ta egunotan eskaintzen digu
metafora bat bikaina:
kalea zisko eginda dago
kasik erreinua aina.
Egilea: Joseba Barandiaran
Doinua: Mutil koxkor bat

Berdintasunaren bila

2014/03/09 14:59
Bada garaia eta, garaia badenez, hona Isaren bertsoak:

Hainbeste sufrimendu
jasan deu historian
Hainbeste astakeri
dena agerian
Hola izan da beti
bai Euskal Herrian
hola izan da ere
baita atzerrian

Berdintasunen bila
ez da lan makala
Aizu gure burukin
izan behar lehiala
Benga segi kalera
utzizu mantala
Emakumek aurrera
garaia badala.


Egilea: Isa Díaz Bravo

Doinua: Pasaiako Plazatik

Maskara jantzita

2014/02/27 13:05
Nekanek gaur egungo egoera eta inauteriak lotu ditu bere bertsoan. Gozatu!

Urte hau ere badoa eta
berdin-berdin dago dena.
Herria xume eta esaneko,
goitik zein behetik eztena.
Inauteriak iritsi dira,
mozorroa da etsipena.
Oihal beltz-beltza jarri dezagun
ta egin ez-ikusiarena.

Doinua: Pello Joxepe
Egilea: Nekane Gonzalez

Legazpiarrak MBn?

2014/02/19 08:25
Labur baina zorrotz, hona hemen Martxoan Bertsoari buruzko Julenen kronika:
Martxoan bertso txapelketaren
zozketaren egunean;
Legazpiarrik ez da ageri
parteartzailen artean.
Egilea: Julen Agirreburualde
Doinua: Kopla handia

Gure Esku Dago

2014/02/07 12:50
Sinesten dugu Euskal Herria estatu izan daitekeela?

Gutxi barru, guk uste

baino lehenago,

Europak izango du

estatu gehiago:

Eskozia, Flandria...

izenez harago,

guk ere izatea

gure esku dago

 

Doinua: Txuriko

Egilea: Asier Iriondo

San Sebastian

2014/01/21 07:55
Danborren erritmoan iritsi zaigu Ane Belokiren bertso ederra.

Gaur begirada bota nahi nuke
nik Donostia aldera
Danborren hotsa ibiliko da
alde batetik bestera
Nahiz ta euria egiten duen
pozik dabiltza gainera
San Sebastianez disfrutatzeko
denek daukate aukera

Doinua: Zeru altuan

Egilea: Ane Beloki

Javi Triguerori

2014/01/14 08:05
Joseba Barandiaranek hil berri den Javi Trigueroren ohoretan egin du bere bertsoa:

Nahiz egia den eguna

argitzen dela egunero,

batzutan kokatzen gaitu

gordinkerian bezero.

Aita, seme eta lagun

bat joaten zaigunero,

hustasuna bihurtzen da

gure bihotzen borrero.

Berrogeiak bete berri

utzi gaitu honezkero,

mendi ibilbide lagun

alai, irripartsu, bero

menditik etorri berri

joana zaren ezkero,

agur izadi zalea

ohore Javi Triguero.

Doinua: Habanera

Egilea: Joseba Barandiaran

 

Soseguzko urte berri on

2013/12/23 12:25
Gabonetan bete-betean patxada eta sosegua opa dizkigu Isak bere bertsoan.

Hotza, izotza eta elurra
jada gaude abenduan.
Beste urte bat dator bizkor
honezkero daukagu han
Gabonak gainean ditugu
hasi gara endreduan.
Badena ez da endredu
ilusio ere buruan.
Dugun erritmo honekin
dena doa segituan.
A tope biziko gara,
hau da onena orduan,
magia eta zorte ona
merezi dugu orainguan,
urte berri on denontzat
pasatzeko soseguan.

Doinua: Larogeita hamar urte

Egilea: Isa Díaz Bravo

Aurkezpena

Legazpiko Bertso Olariak