Denbora-pasa honen inguruan informazioa baino interes gehiago zuten lau lagunen artean sortu zen elkartea eratzeko ideia. Arrazoi ezberdinengatik jarduerarik gabe igaro ziren bi urte horietan, elkartearen aurreneko pausoak errazteko baliagarria izango den diru pixka bat bildu da behintzat. Estatutuetan jaso diren bi helburuen inguruan sortu da elkartea:

1- Modelismoa bere aldaera guztietan sustatu, piztu eta bultzatu.

2- Herriko bizitza soziokulturalean jarduera aktiboa izan.

Guzti honetarako, hitzaldiak, erakusketak, argitalpenen kaleratzea, kontzertuak, erakustaldiak, zozketak, txapelketak, gastronomia edo eta edarien feriak eta beste edozein jarduera aurrera eramateko aukera proposatzen da. Modelismoa, ereduak, maketak eta figurak eskalan eraikitzearen zaletasuna eta artea da. Eztanda-motorezko edo argindarrezko mota guztietako ibilgailuak, hala nola, barkuak, hegazkinak, autoak… Mota askotako ereduak, bai militarrak, eraikinak… Hitz batetan, errealitateko eredu batetik abiatuta eskalan egindako edozer gauza. Denbora-pasa berdina zuten pertsona gehiago herrian bilatzen aritu ondoren, uste genituenak baino zaletu gehiago zeudela ohartu ginen, hortaz, udaletxeari elkartearen bilgune eta muina izateko lokal baten eskaera idatziz luzatu genion. Udaletxearen utzikeriagatik hilabete luzeetan erantzunik jaso ez duen eskaria, alegia.

Honela, elkarteak aurrera egin dezan, atzetik, ezaguna den eta informatua dagoen zaletu talde baten beharra dagoela ondorioztatzen dugu. Honegatik, zaletu edo interesa duten pertsona hauen zerrenda egitea da aurreneko eginbeharra. Zaletu talde hori abiapuntu eta oinarritzat hartuta hasi ahal izango gara udaletxearekin elkartearen bilgunea eta eragilea izango den lokal baten lagapenaz hitz egiten, bertan ezagupenak elkartrukatu eta zaletasun hau zabaldu ahal izateko. Aurki bilera bat antolatuko dugu, baina bitartean ahalik eta zaletu talde handiena biltzen eta informazioa zabaltzen saiatuko gara. Sortu daiteken edozein duda argitzeko edo eta TXIKITOko partaide izan nahi duen ororentzako, txikitoelkartea@gmail.com e-posta helbidea zuen esku uzten dugu. Aio eta animatu!