Argazkiak gure galerian gorde ditugu, prentsaurrekoko argazkiekin batera.

Bidalitako oharrak, berriz, honela dio:

Olaberriko Aizpea gaztandegia garaile, aurtengo Gipuzkoako Ardi Gaztaren 27. Lehiaketan

Beste behin, artzaintzarekin bat egiteko asmoz, jendetza ugari hurbildu da aurtengo Gipuzkoako Artzain Egunera. Goiz osoan zehar izan da zer jan eta zer ikusia Legazpiko Euskal Herriko Plazan. Hainbat gazta aurkeztu dituzte Gipuzkoako Ardi Gaztaren 27. Lehiaketara, eta epaimahaiak lan zaila izan badu ere, azkenean Olaberriko Aizpea gaztandegiarentzat izan da lehendabiziko saria.

Herritarrek ere izan dute euren botoa emateko aukera, izan ere, goizeko 11:00etatik Gazta Dastatze Herrikoia antolatu da eta Aitor Esnaola legorretarrarentzat izan da garaipena. Eguerdian, berriz, Legazpiko hainbat elkarteren eskutik, Ardi Okela Gertatze Gipuzkoako 21. lehiaketa antolatu da. Ardi okelazko pintxoak dastatzeko aukera izan da eta horien artean, lehenengo saria La Bellota Elkarteak eraman du.
Baina lehiaketez gain, Legazpira hurbildu den orok artisau erakusketez gozatzeko aukera ere izan du. Gainera, gaztagintzaren lehena eta oraina ezagutu, ardi mozketak ikusi, eta Euskal Herriko Ardi Latxa arrazako ardi eta aharien erakusketak izan dira ikusgai goizean zehar Legazpin.

>>Aurtengo omenduak
Angel Alberdi eta Atanasi Gesala (Azpeitia-Aizarna) senar-emazteak eta Juan Lizarralde (Oñati) omendu ditu aurtengo Gipuzkoako Artzain Egunak. Legazpiko Erreixabal baserriko Juan Joxe Arangureni eman diote, bestalde, artzain aipagarrienaren txapela. Urteroko ohiturari jarraituz, Ameriketan artzain lanetan aritutako euskaldunak gogoratzen ditu egun honek, eta Inaxio Arrieta eta Maria Isabel Salutregi senar-emazte bolibartarren txanda izan da aurtengoa. Amaitzeko, Eduardo Urarte albaitaria omendu dute artzaintzaren alde egin duen lanarengatik. Omenaldien ostean, Erramun Martikorena abeslari eta artzainak “Xalbadorren heriotza” kanta ezaguna abestu du joan ziren artzain guztien omenez.

Arratsaldean, Gipuzkoako 43. Gipuzkoako Artzain Txakurren Txapelketa ospatu da Urtatzako zelaian. Gipuzkoako bederatzi txakur aritu dira norgehiagoka bizian, eta Elgoibarko Joxe Arrizabalagaren Azkar txakurra izan da txapelduna.