Nik, neuk, ere ez dakit nork edo non sortua den "INBURRE" hitza, (guk, eta gure inguruan "ENBURRE" esaten genuen) bataioetan erabiltzen zena besterik ez. Hitz hori dela eta,horren inguruko bitxikeri bat kontatuko dizuet: Gure baserrian, artazuriketa zela eta,afal aurreko eginkizunetako bat, (ez oso gustukoa umeontzat) artoak zuritzea izan ohi zen,noski! Guraso eta bost umeok, artapilaren inguruan biltzen ginen. Gu, umeok animatze aldera, aittak, "ENBURRE" deiadar egin eta... eskukada karamelu botatzen zuen artapilara. Guk, arrapaladan, zein baino zeinek bixkorrago artoak zuritzeari ekiten genion, karamelu gehien aurkitu ahal izateko. Di-da batean, zareak artaburuz beteta geratzen ziren.