Irail eta urri bitartean euskararen aldeko kanpaina indartsu bat egin nahi du ZingiZangok. Hitzaldiak, erromeria, bertso saioa eta abar izango dira eta horretarako leloa aukeratzeko lehiaketa bat proposatu genizuen web orri honetan. Aukeratutako leloa Xapotoren "Legazpin euskarak herdoilik ez!" izan da.

Epai-mahaiak leloaren mezu zuzena eta burdinaren gaiari heldu izana hartu ditu kontuan irabazlea aukeratzeko. Herdoila burdinak izaten du baina mingainek ere izaten dutelako eta Legazpin euskararen aldeko aipamen zehatza egitea beharrezkotzat jotzen delako eman diote saria. Leloa kamisetetan, karteletan eta hainbat tokitan erabiliko da. Argazkian ikusten duzuena baino diseinu txukunagoa izango du, jakina.

Zorionak, beraz, Xapotori! Egun hauetako batean berekin harremanetan jarriko gara.