Gaur iluntza aldera Brinkolako Saloian Pello Aranburu eta Luis Mari Intza aritu dira Norteko trenbidearen eraikuntzaz. Jende asko izan da, inguruko mendiak zuri-zuri egon arren. Hitzaldian zehar eman duten datu bat deigarria egin zait: trenbidea eraiki zuen enpresa frantsesarentzat Aizkorri mendikatea zeharkatzea Pirinioak zeharkatzea zen. Haien arabera, beraz, Legazpi Pirineoen erdi-erdian zegoen. Eta ez dut uste oker ari zirenik. Kontua da gaur eguneko legazpiarren eta euskaldun askoren ikuspegia aldatu egin dela, eta ez ditugula Pirineoak erdigunean sentitzen, albo batean baizik. Politikoki ere hori gertatzen ari zaigu, tamalez.