XIX. mendearen bukaeran eta XX. mendearen hasieran zortzi seme-alaba izan zituzten Galdots baserrian bertan jaiotako Pedro Makibarrek eta Tolosan jaiotako Joxepa Antoni Arrillagak: Juan, Emeterio, Antonia, Justa, Antselma, Bittori, Felix eta Javier, hurrenez hurren, zaharrenetik gazteenera.

Antselma, aste honetan hil dena, Basilio Elizalderekin ezkondu zen, eta aspaldian Donostian bizi zen. Juanito iloba (Felix Makibarren semea), berriz, Isabel Aztiriarekin ezkondu eta Legazpin bizi zen. Antselma Galdots baserrian jaio zen; Juanito, berriz, handik urrutira gabe, Lekuonaetxeberri etxean, biak Elbarrenan.

Elbarrena auzoa urtetik urtera hustutzen eta hondatzen ari bada ere, tailerrak direla, errepideak direla... oso auzo dinamikoa izan da mendeetan eta mendeetan, eta ez da kontakizun eta istoriorik falta bertan bizi izandakoen ahoetan, eta paperetan, jakina. Askori sinesteak lanak ematen badio ere, jakin behar dugu hango etxe, soro, erreka, baso, harrobi, bide eta abarrek bizipen ugari gordetzen dituztela bere baitan.

Halabeharrez, bertako baserriak eta bertan bizi izandako bizilagunak ezkutatzen ari dira.

Besterik gabe, izan daitezela lerro gutxi hauek joan diren bi herrikideak gogoratzeko eta Elbarrenaren iragan aberatsa aldarrikatzeko.

Argazkian ikusten direnak hauek dira:

1. Felix Makibar

2. Coro Ramirez Makibar

3. Basilio Elizalde

4. Bittori Makibar

5. Juan Makibar

6. Justa Makibar

7. Javier Makibar

8. Antselma Makibar

9. Maria Murua

10. Teodora Aiastui

11. Ramona Sarasola

12. Fidel Marcos Arrillaga

Galdots baserria 2008. urteko urtarrilean