Burdinola eta Izadi Zaleak elkarteak antolatu duen ibilaldia errege-bide zaharrari jarraika egingo da. Bide hori gehienontzat ezezaguna bada ere, esan behar da oso garrantzitsua izan zela antzina. Bi ziren Gipuzkoa goitik behera zeharkatzen zuten bide nagusiak eta Legazpitik igarotzen zena horietako bat zen. Legazpitik Gatzagara joaten zen. "Trafiko" handia izaten zen bide horretan, eta badakigu Gaztelako errege-erreginak bertatik igaro zirela behin baino gehiagotan. Lapur kontuak ere ugariak izaten ziren Inuntziagako (Udana) paraje basatian.

1765. urtean Kotxeen Errege Bidea Deskargatik egin zutenean garrantzia galdu zuen.