Hizkuntz Eskubideen Behatokiak 18 urtez hizkuntza-eskubiderik gabe Osakidetzan dokumentala ekoiztu du. Bertan, Euskal Autonomia Erkidegoko osasun zerbitzuari dagokion hizkuntza-eskubideen egoeraren berri jasotzen da. Pediatria arloan 18 urtez bizitako hizkuntza-eskubideen urraketa sistematikoaren adibide den kasu baten berri ematen da; Luis Mari de Juan Irastorza ordiziarrak bizitakoa, hain zuzen ere.

Uda aurretik Behatokiak Kepa Elortza oñatiarrak Osakidetzaren eskutik jasan zuen hizkuntza-eskubideen urraketa salatu zuen eta bere kasua bideo batean publiko egin ere bai, Duintasun bidea

Uda ondoren, gaia berriz ere hedabideetan agertu da eta Bengoa sailburuak hizkuntza-eskubideen urraketak ukatu eta euskaraz bizi nahi duten herritarrak gutxietsi ditu, besteak beste, Osakidetzaren aurkako ia kexarik ez dagoela eta horrelako kasuak anekdotikoak direla esanez.

Eta Behatokiak bigarren bideo bat hedatu du guztiok dakiguna agerian utziz, alegia, hizkuntza-eskubideen urraketa anekdotikoa ez, SISTEMATIKOA eta DENBORAN IRAUNKORRA dela:

18 urtez hizkuntza-eskubiderik gabe Osakidetzan

Hilaren 19an, etzi, Gasteizko Legebiltzarreko Osasun eta Kontsumo batzordean Rafael Bengoa sailburuak azalpenak emango ditu Kepa Elortzaren kasuaz. Ondoren, Behatokiak eta Kontseiluak adierazpenak egingo dituzte.