Patrick Süskinden "Sommer Jaunaren Istorioa"

Sommer Jaunaren Istorioa, Patrick Süskinek (Das parfum / El perfume nobelaren egileak) idatzitako lanaren antzerkirako egokitzapena, 13 urtez katalanez ikusgai egon ondoren, euskarazko tauletara iritsi da.

José Ramón Soroizek, Xicu Masóren zuzendaritzapean, haurtzaro eta nerabezaroko pasarteak bizi-bizi gogora ekartzen dituen pertsonaia antzezten digu. Bere oroitzapenetan zehar egiten duen ibilaldian gizon misteriotsu baten irudia agertzen da behin eta berriz. Kezkagarri eta ilun, irudi horren oroitzapenak betirako lekua hartuko du pertsonaiaren haurtzaroko memorian.

Testua bizitzaren misterioetan zehar barneratzen den balada eder bat da. Malenkoliaz eta umorez beteriko kontakizun bat, garai ezberdinetan kokatzen dena, ikuslea liluratuko duten ezusteko eta iradokizunez betea.

Axolagabekeriaren eta ahazturaren lozorroan gorde ditugun gure osagaiak esnatzen ditu Sommer Jaunaren Istorioak. Agian horregatik hunkitu egiten gaitu eta ongi pasarazten digu eta zirrara eragiten digu.