ZingiZango Legazpiko Euskara Elkartea - Albisteak

Bertso eskolako gaztetxoak Urretxun

ZingiZango — 2012-02-04T12:01:16Z

Urretxuko bertso eskolako ikasleekin bertsotan aritu ziren Legazpiko Bertso Olari gaztetxoenetako batzuk.

Legazpiko Bertso Olari gaztetxoek Urretxu-Zumarragako bertso eskolako ikasleak bisitatu zituzten ostiralean. Kanpoko eguraldi hotzari aurre egiteko txokolate beroa hartu eta gero, elkarrekin aritu ziren bertso kantari.

Legazpiarrak pintxoen hiriburuan

ZingiZango — 2012-02-03T13:36:20Z

Joan den ostiralean, otsailaren 27an, Frantziako FR3 telebistak, Donostiako pintxoei buruzko programa egin zuen. Legazpiko bi aditu ageri dira bertan: Josema Azpeitia eta Ritxar Tolosa. Hona bideoa:

http://fautpasrever.france3.fr/?page=destinatio n&destination=83&article=641&content=1

Win win, ganamos todos

ZingiZango — 2012-02-02T09:14:23Z

Ostiral honetan gaueko 22:15etatik aurrera Latxartegi Aretoan izango degu ikusgai Zine-Klub taldeak eskeintzen digun filme hau.

Win Win, ganamos todos

Zuzendaria: Tom McCarthy. Herrialdea: Ameriketako Estatu Batuak. Urtea: 2011. Iraupena: 106 min. Generoa: komedia dramatikoa. Aktoreak: Paul Giamatti (Mike Flaherty), Amy Ryan (Jackie Flaherty), Bobby Cannavale (Terry), Jeffrey Tambor (Stephen), Burt Young (Leo), Melanie Lynskey (Cindy), Alex Shaffer (Kyle), Margo Martindale (Eleanor), David Thompson (Stemler). Gidoia: Tom McCarthy; Tom McCarthy-ren eta Joe Tiboniren argumentuan oinarritua. Produkzioa: Mary Jane Skalski, Michael London, Lisa Maria Falcone eta Tom McCarthy. Musika: Lyle Workman. Argazkiak: Oliver Bokelberg. Muntaketa: Tom McArdle. Produkzioko diseinua: John Paino. Jantziak: Melissa Toth.

    Zuzendari-lanetan hauxe da Tom McCarthyren hirugarren filma. Hirugarren lan hau “The Station Agent” (2003) bere lehen filmarekin eta 2007an egin zuen “The visitor” filmarekin hasi zuen bidea itxi nahi duela dirudi. Film guztietan, kanpoko elementu arrotz batek protagonistaren ekosistema lasaia inbaditzen du eta, ondorioz, protagonistak hazkunde izpiritual bat izango du eta, azkenean, zoriontasuna bitxia eta ustekabekoa dela ohartuko da. Formula bat dela dirudi, baina McCarthy zuzendariaren meritua bere filmetako pertsonaiak lasaiak, hurbilak eta egiazkoak izatea da: bere munduan ez dago distantzia ironikorik. Giamatti aktorearen keinu txiki bakoitzak ikuslearen buruan sor daitekeen zalantza ezabatzen du; horrela, batzuetan ikusleak (Roger Ebert kritikariak esan zuenaren arabera) sitcom tradizional baten bertsio hiperrealista ikusten dagoela pentsatuko du.

    McCarthy zuzendariak egun bizi dugun krisiaren ondorioei buruz egin duen fabula honetan orekatu egiten ditu samintasuna eta baikortasuna. Horrela, hainbat pertsona zintzo daude erabaki okerrak hartuko dituztenak baina, era berean, bestelako egoera batean noraezean ibiliko liratekeen arima bikiak elkartzen ditu. Eta azkeneko zatian gatazkak konpontzeko gaitasuna galtzen badu ere, bere filma ikuslearen barreneraino iritsiko den azken plano batekin bukatzen du. (Noel Ceballos, Fotogramas.com)

Herrira plataforma Legazpin

ZingiZango — 2012-02-01T09:12:04Z

Legazpin, Egin Dezagun Bideak bultzatuta, presoen aldeko Herrira plataforma martxan da.

Egin Dezagun Bidearen eskutik, datorren igandean Herrira plataforma aurkeztuko da Donostiako Kursaalen. Legazpin ere lanean ari dira presoen aldeko talde hori sortzeko. Talde horretan parte hartu nahi duenak, jakin dezala, asteartero elkaruko dela talde hori Kultur Etxean arratsaldeko zazpietan.

Bertan parte hartzera eta laguntzera animatu dute antolatzaileek.

Inauteriak 2012

ZingiZango — 2012-01-31T07:10:20Z

Udalaren Kultura Sailak 2012ko inauterien egitaraua bidali digu. Hona hemen:

Otsailak 16, osteguna: Doinua Musika Eskolako ikasleek Inauteri kalejira egingo dute 17:30etatik aurrera.

Otsailak 17, ostirala: 16:00etan herriko ikastetxeetako haurren desfilea abiatuko da Santikutz Egoitza paretik Santikutz Kalea eta Kale Nagusian zehar plazan amaitzeko. 17:00etan Lintx-en etorrera Euskal Herria plazan eta Urolatarrak Txaranga hasiko da kaleak alaitzen 19:30ak arte.

19:00etatik Alaitasuna Errondaila Mariatxi bihurturik kalez kale ibliko zaigu.

Otsailak 18, larunbata: Legazpiko Gazteak elkarteak antolatutako ZAPATUKO IÑAUTERIA: Gaia: Itsasoa, Legazpiko hondartza, kostaldea.

Otsailak 19, igandea: “Sorgin dantza” konpartsa abiatuko da plazatik 12:00etan eta erdiguneko kaleetan ibiliko da. Arratsaldean Laubidetik abiatuko dira eta Plazan amaituko dute 19:00etan Lintx-en agurrarekin.

ZingiZango ere santa eskean

ZingiZango — 2012-01-30T10:41:59Z

Larunbatean, Santa Ageda bezperan, ZingiZangok ere santa eskea egingo du. Legazpiko Bertso-Olariekin batera, 19:00etan, Hegialdeko Maiatza tabernatik abiatuko gara.

Baserritar jantzia, trikitixa, koplariak eta makilak. Beharrezko guztia gertatuta daukagu. Hegialden hasi eta tabernaz taberna zeharkatuko dugu herria. Koplariek koplak inprobisatuko dituzte eta, koplatik koplara, Oskorriren eta Gabriel Arestiren kopla ezaguna kantatuko dugu guztiok batera:

Arnasa hartu beharra dugu

eta ireki atea

Arrainak ura eta euskarak

bere unibertsitatea

Badator Goiberri

ZingiZango — 2012-01-29T17:07:31Z

Otsailaren 3an, Goiberri aldizkariaren lehenengo alea jasoko dugu Hitzaren harpidedunok. Goierritarra eta Otamotz aldizkarien baturatik sortu da eta bi horiek baino zabalagoa izango da, izan ere, legazpiarrok ere jasoko dugu.

Lehenengo alean, besteak beste, ZingiZangoko kide bati egindako elkarrizketa argitaratuko da. Hona hemen aurkezpen bideoa:

Informazio gehiago Hitzan bertan irakur dezakezeu:

http://goierri.hitza.info/2012/01/26/berritua-bakarra-bateratua

"Legazpiko Ahotsak" egitasmoa aurrera doa

ZingiZango — 2012-01-28T12:17:54Z

2010. urtean Burdinola eta Badihardugu elkarteek abiatu zuten "Legazpiko Ahotsak" egitasmoa aurrera doa, Legazpiko Udalaren laguntzaz . Hogeita hamabi elkarrizketa egin ziren eta horietatik bederatzi landu eta denon eskura daude interneten.

Alde batetik, bideoak ikus ditzakegu, gaika sailkatuta. Bertan, Pedro Madina, Anixeta Gereñu, Francisca Agirre, Paxkual Zabaleta eta Genaro Agirreri egindako elkarrizketak daude.

Bestetik, testuen transkribapenak daude. Hauexenak: Juanita Inurritegi, Ines Ibargutxi, Genaro Agirre, Juan Urzelai eta Inaxi Gereñu.

Helbide elektroniko honetan topa ditzakegu: http://www.ahotsak.com/proiektuak/legazpiko-ahotsak/

Txirrindularia korrilakariaren kontra

ZingiZango — 2012-01-27T07:48:09Z

Igandean apustua egingo dute Luis Ibargurenek eta Pello Agirrek Korostira nor lehenago igo. Luisek korrika egingo du eta Pellok bizikletan.

Igandean goizeko hamaiketan tuneletik abiatuko dira biak batera. Lakiolakoak korrika egingo du eta Ibarrolakoak bizikletan. Denetariko iritziak daude. San Inaziotan egiten den proban denborarik onena bizikletak omen du baina halako alderik ere ez omen dago.

Nork irabaziko du? igandean galderaren erantzuna.

Sorgintxulok gidatutako jolas kooperatiboetan ederki pasa genuen!

ZingiZango — 2012-01-25T14:45:51Z

Pasa den larunbatean Jolas Kooperatiboak ospatu zituzten Kultur Etxean.

Pasa den Larunbatean Sorgintxulo Aisi Taldeak gidatuta jolas kooperatiboak ospatu zituzten legazpiko Kultur Etxean. Bertan LH3, LH4 eta LH5ko 26 gaztetxok hartu zuten parte. Bi orduz sei jolas kooperatiboetan aritu ziren eta antolatzaileen esanetan, ekintzaren helburuak bete ziren: " euskaraz hitz egitea, gaztetxoen arteko harremana eta errespetua sustatzea eta lan taldean aritzen ikastea".

Legazpiko itsasoa

ZingiZango — 2012-01-24T10:10:38Z

Gazte asanbladak zapatuko inauteriei buruz ohar hau zabaldu nahi du:

Nahiz eta denbora gutxiren faltan egon, zapatuko inauteriekin aurrera egiteko erabakia hartu da. Hilabete baino gutxiago geratzen bada ere, zeozer itxurosoa egiteko modua ikusi da bi bileretan azaldutako gazteen aldetik.

ITSASOA da aurtengo gaia, mozorrotzeko zein karroza ta kalejirarako joku dexente ematen du. Baina berriz ere dei bat egin nahi diogu lLegazpiko jende guztiari, zahar zein gazte, elkarte, lagun talde, eta, batez ere, kuadrilei. Gaia askoz ere ikusgarriagoa da talde txikitan tematikari buruzko mozorroak eramanda, kalejiran jokua eman dezaketen numeritoak erdi prestatuta… hitz batean, denon artean gaia zabalduta eta eta, talde bezala, aurrera eramateko inplikatuta. Ez dugu kalejira karrozara eta bertan daudenengana mugatu nahi, herri osoan ibiltzen baikara eta askoz gehiagorako potentziala dugula dakigulako. Aurretik esandakora mugatzen jarraituz gero, ez diogu bizitza luzerik ikusten egun honi.

Karrozaren ideia garatzeko, kalejirari buruz hitz egiteko eta egun honi beste bultzada bat eman diozaiokeen edozer gauzaz hitz egiteko, arratsalde gehienetan biltzea espero dugu karroza egiteko utzi diguten pabilioian. Aurretik ekonomatoan egingo genuela esan bagenuen ere, azken orduko arazo bategatik ezin izango da bertan egin. Arazoa ekonomatoa uzten digun pertsonak berak konpondu digu beste pabilioi txiki baten leku bat utzi baitigu. Hemendik eskerrak eman besterik ezin dugu egin, bere laguntza gabe ezinezkoa baitugu karroza bat antolatzea (ordaindu ezin dugun prezio bat ordainduta ez bada). Lokal berria Aitxuri ondotik Txillida lekura doan kailejoiaren bukaeran dago, lnagintza enpresaren ondoan hain zuzen ere.

Horregatik, egun horretarako, berriz ere, mundu guztia animatu nahi dugu, batez ere kuadrillak, bertan lanak garatzea errazagoa dela ikusten dugulako eta gazteriaren antolaketan talde garrantzitsuenak direlako.

Laster egitaraua (printzipioz tipikoa) argitaratuko dugu eta bazkarirako tiketak salgai jarri. Edozein proposamen edo dudatarako gazte asanbladarekin jarri zaitezkete kontaktuan, edo arratsalderen batean karroza egiten ari garen lekutik pasa.

OLATU HAU PASATZEN EZ DEZAGUN UTZI!

Egin dezagun bidea

ZingiZango — 2012-01-24T07:02:18Z

Urtarrilaren 26an, 19:00etan, Legazpiko Egin Dezagun Legazpiko plataforma aurketuko da Kultur Etxean. Antolatzaileek bertara joateko deia egin diete legazpiarrei.

Formigalera Izadi-Zaleak elkartearekin

ZingiZango — 2012-01-21T19:19:09Z

Legazpiko mendizale elkarteak, urtero bezala, elurretara joateko autobusa eta egonaldia antolatu ditu. Aurten Formigalera joango dira, otsailaren 25ean eta 26an. Izen emateak, berriz, otsailaren 16a bitartean egin beharko dira, Izadi-Zaleak-en egoitzan, astearte eta ostegunetan, arratsaldeko zazpietatik zortzietara.

Kontuak garbi!

ZingiZango — 2012-01-21T18:50:45Z

Udal gobernuak bi bilera ireki antolatu ditu aurrekontuak azaltzeko.

Bilera irekiak izango dira, urtarrilaren 23an, Kultur Etxean eta, 24an, Domingo Agirre ikastetxean. 19:00etan izango dira eta bertara joateko deia egin diete legazpiarrei.

Haur danborrada

ZingiZango — 2012-01-21T11:31:11Z

Ostiralean haurren danborrada izan zen gure herrian. Guraso batek argazkiak bidali dizkigu eta gure galerian sartu ditugu.

Hona hemen argazkiak:

http://www.zingizango.com/argazkiak/jaiak/haurren -danborrada-2012-01-2 0